假期前夕, 找牙醫例行洗牙及檢查牙齒, 照了三張X ray, 發現幾隻牙齒都有陰影, 即代表有蛀牙, 有一隻更快要蛀入神經線, 隨時爆發牙痛災難。牙醫提議先杜牙齦, 日後再加上牙套, 才能杜絕蛀牙機會。肉在枮板上, 別冇他法, 唯有照他建議而行。 洗牙: $400、三張X ray:$300、杜牙齦$3,500, 實收現金$4,200。好貴呀! 呢個價買到一部80G i-pod加一部都好OK的手機。
我忍不住問牙醫: 「點解杜牙齦咁貴?」
他答: 「不嬲都係呢個價錢...」然後, 我用了 「你都好似冇答我」的眼神望著他。
他續答: 「杜牙齦要分三次嚟, 你睇, 做一次都要花咁多時間啦...」我望望錶, 想都只不過是20多分鐘, 他的時間觀真特別!我始終覺得他沒認真答我。不過我還是信他, 試過在他那裡連拔兩隻智慧齒, 小痛沒腫, 連止痛藥我也沒吃。他的確有兩三下功夫!
我還問了另一個存疑已久的問題, 只恨問得太遲。
我問: 「到底有冇人年紀大咗、老咗, 棚牙都依然咁好, 連一隻蛀牙都冇?」
他答:「梗係有啦, 要識得一早保養...」
唉, 早點問、早點保養, 不用今天破費。
很久以前在牙醫診所當過暑期工, 都知道牙醫工作一二。這也算是一行厭惡性行業, 要修補爛牙、對付膿瘡、聞口氣、口水痰一齊嚟...而且牙醫的職業生涯比醫生短, 因為拔牙要出力、拿牙鑽要手定, 而且工作細微好傷神, 需年輕力壯才可應付。據說, 成為一個牙醫, 所需的苦學時間及心血, 不遜於醫生, 可是兩者的社會地位始終有高低。好啦, 乖乖付$3,500啦, 我講服我自己!
還有, 教你一個方法, 看牙醫沒痛苦。想著他正為你仇人睇牙, 躺在那裡的, 不是你自己。將痛苦轉移, 好有效! 我覺得好掂喎!
7 comments:
嘩...仲以為你只係普通洗牙檢查, 點知咁大鑊... 我記得數年前杜過一次牙齦, 痛足3日, 自此後話過要好好保護牙齒...牙痛固然慘, 洗錢就更品加痛上加痛, 最慘係牙痛、肉赤又不能進食...慘慘慘
wei wei, I want to know who is your 仇人 wor...haha
OK喎,杜了牙齦當晚去飲喜酒,還可食齊九大簋,咬多幾件乳豬都仲得!下次睇牙醫,記住一招痛苦轉移大法,真係好有效!睇牙真係好貴,整牙套仲貴,要儲錢先得。係呢,點解睇牙冇得12個月免息分期呢, 銀行應該諗諗佢!一定有客路的!
其實, 我係一個善良的人, 所以我整牙時, 只係諗住呢個人, 思想內容如下「家姐, 你都有今日啦, 細個唔請糖我食, 抵你死, 要睇牙醫打針、鑽死你...」好細個時, 我家姐真係唔請糖我食, 我求佢幾條街都唔請!正衰人!至於其他仇家? 真係真係無邊幾個喎!
睇牙有得12個月免息分期架!! 我上次剝智慧牙，醫生話大額就可以分期。你試下問下你0個個有無!
記憶中你絕不嗜甜，蛀牙何來？究竟你有無每天也刷牙？
其實蛀牙非完全關係到嗜甜的問題上,牙菌膜時刻在齒縫間形成, 即使用了牙線卻清潔不夠徹底,例如牙齒天生多奇怪異隙,便無從深入清潔, 容易蛀牙。Thanks Queen, 忘記了你是女皇的教室中的女皇!失敬!
Post a Comment