塵歸塵 土歸土

香港有個補習天王, 愛LV成狂, 為LV花花花花, 當然, 他說有錢不是大晒, 還要有心, 於是他苦學法文寫信俾LV總部, 以誠意打動人家。所以他對於成為香港區頭號VIP, 引以為傲。年多前, 他向LV總部以HK$160萬訂造了一隻鉈飛輪腕表, 鑲鑽又鑲石, 個「靚」款由補習天王自行設計, 一等十四個月, 話說LV送表俾佢當日, 特別有專員從法國飛來香港打點伺候, 還在半島酒店為他倆公婆設宴, 安排腕表交收儀式。咁大件事, 加上當時快要開學, 梗要make some noise, 等啲米飯班主羡慕一下, 於是引來數間雜誌社大大篇幅報導。幾本雜誌跟他做的都是家居專訪, 見林林種種LV攤開一地, 但間屋還是欠了點品味, 當然, 他不認為啦。因為, 根據有LV便是有品味的理論, 他自己設計的私家卡拉OK房, 大大個LV logo滿佈四邊牆, 便是有品味的又一力証。

寫這篇, 因見這圖, 又想起這個補習天王, 想起他下次出現時可會這麼說「我已為自己打造了一個LV墳頭, 富貴於我如浮雲, 誰理身前身後名, 終有一天與LV一起埋葬, 唯有知識先至可以留傳萬世, 造福萬民, 所以, 同學們應抓緊當下,活在今天,努力充實自己呵。(潛台詞應該還有這一句:仲等咩呀, 即係科水補習!)」

Photo from: Laura Keeble's graveyard installation.

事實上, 我欣賞補習天王的自信心, 話說他勤寫信給LV總部的原故, 深信已練得一手及一口好法文, 於是便開設補習班教授法文, 堪稱全港補習界第一人。真的要有相當自信心!

這句抄自雜誌的:「今年4月LV 第5代傳人Benoir Vuitton 來港出席展覽,難得碰面,補習天王立即跟他影合照。補習天王話佢同第5代傳人經常以email聯絡,見面時仲會用法文溝通!」我衷心希望補習天王能為港人爭光, LV 第5代傳人下次會識講廣東話同佢溝通啦, 我覺得咁至威。